آچیقمکتوب - 9

آچیقمکتوب - سوروشتورمانین آردی وار ...

-اوردا اولان آداملارین هر بیریسینی تانیرسینیز یازین؟ آدلاری ایسه سوی آدلاری هارالی اولدوقلارینی هاردا و نئچه ایل تانیش اولدوغونوز نه ایشده چالیشتیقلارینی سونونجو دفعه هاردا گؤروشدوگونوزو و باشقا بیلیشیملری (ایططیلاعتلاری) اینجه له مکله یازین؟

یازانی کاغاذ اوسته قویارکن دئدی:

- ایستیرم کی اون صفحه دن چوخ اولسون. قیسا جاوابلار ایسته میرم.

یازدیم:

-یازدیغیم کیمی من چوخ آداملاری تانیمیرام. نئچه ایلدیر اوزاقلاشمیشام. آنجاق " اکبر آزاد" ی تانیرام. چونکو کیتاب سرگیلریمده اونون کیتابلارینی ساتیردیم. |"بهنام شیخی" ایله ایش بیرلیک آپاراردیم بیر زامان و گئییم ایشینده اولوردوق. بیرده کی 88 – اینجی ایلده برابر توتوقلانیب ایکی آی ائوینده ساخلانیلدیق. "روستم کاظیمپور" دا ایندیکی ایش یییه م دیر. اونو ستارخان مراسمینده (شهرری) ده اولاندا گؤردوپ تانیش اولدوق. هردن بیر تئلفونلا دانیشاردیق. 25 گوندور اونون یانیندا ایشله ییرم. "حمید منافی نادارلی" نین دا آد سانینی ائشیتمیشدیم. اوندان خوشوم گلمه مه دیگیمه گؤره اونا یاخین اولمارام. "منصور فتحی" نی ده ائله ییغینجاقدا ائو یییه سی اولدوغونا گؤره تانیدیم. ائله بوقدر.

کاغیذی وئردیم. آدام باخیب بورونوندان بیر اوجا یئل ائشیگه چیخاریب پوفله دی:

-هیف! ائله بو !؟ اوردا 200 نفره یاخین آدام وارایدی. سن "علیرضا فرشی " نی تانیمیرسانمی؟سن " عزیز فرشی" نی تانیمیرسانمی!؟ سن" ک.خ.آ" و "علیرضا بابایی" نی اورا چاغیریبسان؛ آنجاق تانیمیرسانمی! اینتیظار وارینمی من اینانیم بونلارا!؟ تایماز ! سن دوزون یازمایانجاق بیزه قوناقسان!؟ کئچن دفعه ایکی آی قالیبسان. بو کره ایکی ایلده قالسان قالیبسان! کیمسه نین الیندن بیر ایش گلمز!؟ نئجه اؤزون سئچیرسن!؟ یاز قوی تئز بوراخیم گئده سن. یاخشی یازسان چوخ بیزه قوناق اولمازسان!؟ گئت یاشامینا یئتیش!؟ سنین نه ایشین بو آیریمچیلارلا!؟ سنین نه ایشین بو ایستیقلالچیلارلا!؟ او قدر کی بیز بیلیریک سن بیر یازارسان!؟ سن کی بیلیرسن بهنام خائن دیر!؟ ندن اونا قوشولورسان!؟ خالقین اوشاغینی قیزینی اورا چاغیریب توتوقلاییرسان!؟ هئچ اوتانمیرسان؟

اللریمی گؤیه آپاردیب دئدیم:

-بورانی دوز دئییرسیز! من چوخ اوتاندیم چاغیردیغیم قوناقلار بوشونا توتوقاندیلار. هه سیز دوز دئییرسیز! آنجاق سیز دییه ن ایتتیهاملار بهناما یا باشقالارینا گؤره منه بللی دگیل و من بهتان یوخسا تهمت وورا بیلمرم آداملارا. بیرده من آنا دیلی چالیشقانییام. کیمسه یه ظن ائدم کی بو یولدا او منله یوخسا من اونلا قادین اولسون یوخسا کیشی ایش بیرلیک آپارارماغا حاضیرام. منه هانسی تشکیلاتا باغلی یوخسا باغیلسیز اولماغی اؤنملی دگیل. ائله اؤزومده بو برنامه یه گؤره اینجیگم!؟ من توتوقلانمامالی ایدیم. بیر ایش گؤرمه میشم اوتانام. آنجاق قوروجولاردان اینجیمیشم.

- نه لریندن اینجیمیش سن؟

- او قالسین ائشیگه چیخاندان سونرا ؛ اونلاری تاپاندان سونرا اؤزلرینه دییرم.

-چکینمه بو سؤزلردن! نه اولار قوی منده بیلیم بلکه دوز سؤز اولدو سنه یاردیم ائله دیم؟

- من بیر شی ائتمه میشم کی یاردیما ایحتیاجیم اولسون! اونلار گره ک گیزلی شکیلده برنامه قورمایایدیلار کی سیز اورانی تهلوکه کیمی باخاسینیز!؟ دوزدور یوخسا یوخ!؟

بیر آن بئله آلدیم سورقوچو دونوخوب دئدی:

-منجه حق سنله دی!؟ بیز اورا چوخ آز آدام گلمیشتیک. سندن بیر سورقوم واردی؟ سنجه بیز ایسته سه ایدیک اورا توتوقلاماق اوچون گله ک ایکی خیردا آراباایله گلریدیک کی چوخودا اؤزوموزویدوک!؟ بیز گلدیک اوردا کیمسه بیزه دوزگون جاواب وئرمه دی! بیزده مجبور اولدوق اوجور داوراناق.

سؤزونو کسیب آردیندا دئدیم:

-آنجاق سیزین امکداشلاردا دوزگون داورانمادیلار. آرواد اوشاغی برک قورخوتدولار. او ائو یئرینده ایدی و ائو ییه سی سیزین الینیزده. ندن بئله ایش گؤردونوز کی میللت تحریک اولوب و دؤیوشمه باش وئردی.

منجه او آدام توتوقلامالارا گؤره دوز دئییردی. ایسته سه ایدیلر توتوقلاماغا گلسینلر البت کی بؤیوک آوتابوس گتیریب چوخلو مامور گتیرردیلر. طبیعی دیر اونلارا بیر مئساژ گئدیبدیر. " بئله نجی بیر ییغینجاق وار." تئهران ایططیلاعاتی (بعض ایچاتمالارا (حدس لره ) گؤره سیپاه) اورا باش وورماغا گؤره یولا دوشورلر. بیلدیگیمه گؤره 4 آدام گلیر. تئهراندان چیخارکن نسیم شهرین کلانتریسینه بیسیم وورورلار و یاردیم اوچون عسکر ایستیرلر. آنجاق من بیلن اورانین کلانتریسی بو مساله نی اؤنم سه میر. بیر ماشیندا بیر درجه وار  و ایکی سیلاحلی عسکر یوللانیر. البت کی سونرالار کلانتری ده اولان آداملار جزالاندیرلیبلار. دئمه لی یم بونا گؤره چوخ بیلیشیم یوخدور.

 گئجه یاواش یاواش یاری یا یاخین اولوردو. یاخین 3 ساحاتدیر گئجه آزانی دا دئییب و من هله سورقو اوتاغیندا سورقوچوایله یم. هله ایندیه دک دؤیولمه میشم. آنجاق تهدید اولونموشام یوخوسوزلوغا باشقا جور داورانماغا (!!) اوزون زامان توتوقلو قالماغیما و باشقا.

سورقوچو یئنی بیر سورقونو یازماغا باشلاییبدیر. بیرآزدان کاغیذ قاباغیما قویولور:

- تئهراندا چالیشقان تجزیه طلبلرین آدینی یازین!؟ سیزجه اونلارین آمالی ندیر؟

بو سوالی گؤرجک دئدیم:

-من بو سوالا جاواب وئرنمرم.

آدام قیزدی منی قارسالادی:

- نه!؟ ائلیه بیلمزسن سورقولاری یانیتلامایاسان!

بیلدیم کی شوخلوق ائتمیر اونا گؤره یازدیم:

- بو سوال تلقینی سوال دیر. هئچ آییریمچی تانیمیرام. بئله آدام دا اولسا آدیندان بللیدیر نه ایستیر. ایستیر اؤلکه نی بؤلسون.

 

آردی وار

*******

   *)*)

بیرینجی بؤلوم  

ایکینجی بؤلوم

اوچونجو بؤلوم

دؤدونجو بؤلوم

بئشنجی بؤلوم

آلتینجی بؤلوم

یئدینجی بؤلوم

سککیزینجی بؤلوم