آچیقمکتوب ائوین دهـ یییک (5)

آچیقمکتوب – ائوین دهـ یییک

سانتافا بیر یئکه گیریش قاپینین اؤنونده دورموشدو. بیر آز اؤنجه بیر عسکر آرابانین ایچری گیرمک اوچون اویوملاماغا باشلامیشدیر. قاپی آچیلدی. آرابا ایچری گیردی و ایکنجی قاپیدان ایچری گیرمک اوچون ماشینی آختاردیلار. (دال صاندیقی آچیب باخدیلار) سونرا ایکینجی قاپی (ایلکتیریکلی قاپی) آچیلدی.

ائوینین گیریش قاپیسی

ایکینجی قاپیدان دا ایچری گیردیک. قاباخدا اوتوران آریق آدام ایکی گؤزباغی (چشمبند) بیزه وئردی و ایسته دی گؤزلریمیزی باغلایاق. گؤزلریمیزی باغلادیق. بیر آن 88 – اینجی ایلین خوردادین 18 – ینی خاطیرلادیم. ائله بئله نجی بورا گتیریلدیم. او ایل ایکی آی ساخلانیلدیم. یئنه دؤرد ایلدن سونرا تاریخ منه تیکرار اولوردو. تانریم بو کره نه قدر قالمالی یام....!؟

آرابا بیرآز یول گئتدی و سونرا ساخلادی. بیزی اندیردیلر. اندیگیمیز یئردن نئچه آددیم سولا آتیب بیر اوتاغا گیردیک و او آداملار (ضابیط لر) بیزی تحویل وئریب گئری دؤندولر.

-    " دوننکیلرین قالانی دیرلارمی!؟" بیزی تحویل آلان سوروشدو سوروجودن.

-    " هه ! بو ایکسینی دونن تاپانمادیق بو گون گتیردیک!! " سوروجو یانیتلادی

بیزی بیر کانئکسه بنزهـ ین اتاقدا سویوندوروب و زیندان گئییمی گئییندیردیلر. بیر آچیق گؤی شالوار و کؤینک بیر حوله بیر دیش فیرچاسی ایسه دیش خمیری و من بیر آچیق قهوه دمپایی گئیدیم. سونرا باشقا بیر اوتاغا آپاریلدیق بیر کاغیذ قاباغیما قویدولار. اوندا آدی و باشقا اؤزل اینفورماسیالاری آلدیلار سوندا بارماق باسدیم. ائله اوتوردوغوم صندلی نی چئویریب و گؤزباغیمی آچ دئدی آدام.

گؤزباغیمی آچدیم و اؤنومده بیر کمرا (دوربین) گؤردوم. شکلیمی چکدیلر. سونرا گؤزومو باغلادیلار. ائشیگه چیخدیق. بیر باشقا آدام منیم الیمدن یاپیشیب و روستم قارداشیمیزین دالینجا دوشمه ییمی (ایزله مه ییمی) ایسته دی. ائله او کانئکسین اؤنونه آددیملادیق. 10 – 12 آددیمدان سونرا زنگی چالدیلار. قاپی آچیلدی. خیردا بیر تایلی قاپی ایدی. قاپیدان ایچری گیریپ اوزون بیر سالن دان سونرا پیلله چیخدیق یوخاریا. بیر آز ساغا  بیر آز سولا و بیر باشقا اوتاغا گیردیم. اورادا گئنه گؤزومو آچدیلار.

هه! دوکتور یانیندایدیم. اوره ییمین تاپییلدیسینا قولاق آسدی. بنزیمی (نبضیمی) یوخلادی. آغیرلیغیمی بیر تَرَزی ایله نوتلادی. گؤزومه قووه چیراغیلا باخدی. قولاغیما باخدی. سونرا بیر فوروم وئردی دولدوروم و بارماق باسدیم. فورومدا اؤز چئکاپینی یازدی و مندن ایکی سورغو سوروشدو:

-    " 1 - توتوقلایاندا سنی دؤیمه دیلر کی ضابیطلر؟ "

-    " 2- اؤزل خسته لیگین یوخسا گون ده یئدیگین درمان یوخوندورمو؟"

هر ایکی سورغویا "یوخ" دئدیم.

سونرا گؤزومو باغلادیلار و ائشیگه چیخارتدیلار.

باشقا بیر آدام الیمدن یاپیشدی و ایسته دی اونون آرخاسینجا گئدم. بیر آز گئدیب دوردوق. منه دئدی گئت ساغ ورینده کی اوتاغدان اوچ پتو گؤتور. من اورا گیریدم دؤرد پتو گؤتوردوم. سوروشدو :

-    "ندن دؤرد دنه گؤتوردونمو؟"

دئدیم : " من اوشوتکن آدامام و بورا سویوق اولور."

دئدی: اوندا کئچمیشده بورا گلیبسن می!؟"

دئدیم : "هه!"

سونرا گئنه یوللاندیق. ایکی کره ساغا دؤندوک و بیر اوزون سالنا گیردیک. 18 آددیم سایدیم و بیر قاپی اؤنونده دوردوق. قاپی آچیلدی. ایچری گیره رکن آدام سؤیله دی:

-    " اوتاغین 72 دی. اونوتما."

هه دئدیم و قاپی باغلاندی. مندن سونرا بیر قاپی آچیلدی و بیلدیم کی روستم له بیر سالونداییق.

*********

   *)*)

بیرینجی بؤلوم              بو یازیا باغلی اولان یازی                  

ایکینجی بؤلوم

اوچونجو بؤلوم

دؤدونجو بؤلوم

بئشنجی بؤلوم

یئدینجی بؤلوم